Туризм – экспорт ретінде: 230 мен 1000 доллар арасындағы айырма

Облысқа шыққан сайын біздің жерлеріміздің сұлулығына таңғалудан жалықпаймын. Бірегей шатқалдар мен көлдер, мөлдір тау өзендері, жұмсақ әрі қалың шөп және мол-мол таза ауа.

Естуге біртүрлі болғанымен, туризм – экспорттық тауар, ал туризмнің сапасы жоғары болған сайын қосылған құн да жоғары болады. Тәулігіне үш мезгіл өте сапалы тамақ, қауіпсіз көлік, гид, шатырлар және тіпті жылжымалы моншасы бар екі күндік тур маған 230 доллар тұрды. Дубайда, Тайландта немесе осы сияқты елде мұндай тур бір адамға 1000 доллардан асып түсер еді.

Жігіттердің көрсеткен сервисі өте сапалы, тіпті керемет болды. Оларға көп рахмет. Олардың аспазы дайындаған тағам Алматыдағы көптеген мейрамханалардың тағамынан әлдеқайда дәмді еді.

1000 мен 230 арасындағы осы айырма – ортаға, инфрақұрылымға, жылжытуға және т.б. көбірек тәуелді әлеует.

Мемлекет өзіне KPI ретінде дәл осы айырманы қоюы керек шығар.

Сапар барысында назар аударған бірнеше мысал келтірейін.

1. Байланыс

Бірегей жерлерде байланыс мүлде жоқ. Тіпті Көлсай 1 көлінде де жоқ. Байланыс – ең алдымен жылжыту құралы. Турист сурет түсірген сәтте оны Instagram-ға, TikTok-қа, Facebook-ке импульсивті түрде жариялау ықтималдығы, кейін байланыс тауып алған кезде болатыннан әлдеқайда жоғары, ал сол кезде бұл ниеті сөніп қалады. Ал SMM бүгінде жылжытудың басты көздерінің бірі. Одан бөлек, байланыс – қауіпсіздік сезімі.

2. Жолдар

Жолдар ұлттық парктердің тосқауылдарына дейін ғана салынған, ал іште жол жоқ, бір жерге жету үшін өте жақсы көлік керек. Асфальт қажет емес, жай жол керек, топырақ жол болса да, бастысы – тегіс әрі үнемі күтіліп тұратын жол. Бұл автобан салу емес, қымбатқа түспейді, ал пайдасы оның құнынан әлдеқайда көп болады.

3. Қауіпсіздік

Шарын – нағыз сұлулық мекені, өте әдемі, бірақ қауіпсіздік жағы нашар. Бірегей көріністер ашылатын құзды жерлер бар. Жай ғана алаңдар жабдықтау керек, сонда адамдар суретке түсіп, көріністерді тамашалау үшін келетін болады. Бізге 4-5 тамаша локацияны көрсетті, бірақ жақындап барудың өзі қорқынышты. Ал ондағы көріністерді киноның өзінен де көре алмайсың.

Бұл тізімді жалғастыруға болады, мұндай ұсақ-түйек өте көп. Бағалар арасындағы айырма дәл осындай ұсақ-түйектерден қалыптасады, ал осы айырма өздерін туризмге арнаған адамдардың табысын арттыра алар еді.